Ilustración de Poly Bernatene |
O 2 de abril de
1805 naceu escritor danés Hans Christian Andersen, escritor de contos
como: O traxe novo do emperador, A sirenita, O
patiño feo, As zapatillas vermellas, O soldadiño de
chumbo...
Cada
ano, coincidindo coa data do seu nacemento, celébrase o día do libro infantil.
Hoxe tamén
se celebra o día Mundial de Concienciación sobre o Autismo.
Pero hai outra celebración neste día, e é que a editorial Kalandraka cumpre anos... e xa van 15 gozando dos xeniais libros desta editorial
Pontevedresa que xa recibiu moitos premios, o último, o premio nacional á mellor
labor editorial.
Pensando nestas tres celebracións veu á miña cabeza
unha colección de libros: Makakiños, creada por Kalandraka en colaboración coa Asociación Baión de
Tratamento do Autismo (BATA).
www.kalandraka.com/ga/coleccions/nome-coleccion/ir/makakinos/ |
Esta colección
está pensada para achegar a lectura a persoas con necesidades educativas
especiais en resposta á demanda de material de apoio para facilitar a lectura a
nenos con discapacidades intelectuais.
Os destinatarios
destes libros son persoas con necesidades de apoio: nenos con parálise
cerebral, trastornos de desenvolvemento (autismo) ou de comunicación
(disfasia). A lectura apóiase -ademais do texto e a ilustración- nun sistema de
pictogramas SPC (Símbolos Pictográficos de
Comunicación), baseado en debuxos e cores, creado en Estados Unidos por Roxanna Mayer-Johnson: os pictogramas referidos a
substantivos enmárcanse en cor laranxa, os verbos en verde, os adxectivos en
azul, os pronomes en amarelo...
"O patiño feo" |
Makakiños é o primeiro
proxecto editorial en utilizar este sistema. O texto adaptouse para unha
lectura máis doada, reducindo as palabras con carga simbólica, as metáforas e,
en definitiva, restando abstracción á linguaxe. As ilustracións tamén se
realizaron buscando a máxima concreción e a mellor comprensión da linguaxe
plástica. Por estes motivos, os libros de Makakiños son
un material de apoio que se pode utilizar mesmo en centros de Educación
Infantil, para un primeiro achegamento aos libros por parte dos pre-lectores,
facilitando o seu acceso ao mundo da lectura.
Adaptación de "O coelliño branco" |
Desexo que sigan xurdindo iniciativas como esta que
acheguen a lectura a todos os nenos, rompendo as barreiras comunicativas, proporcionándolles unha maior autonomía persoal e
estimulando a súa imaxinación, e que nos permita velos gozando da
lectura, como Gloria con “La ratita presumida”
Interesante ese material de kalandraka, non o coñecía.
ResponderEliminar